In Loving Memory Of Captain Bilal Zafar Abbasi-shaheed

Maa Ki Arzoo--


MAA KI ARZO.....
Sochti hoon...........janey us baras kaisi chand raat thi
K jub merey aangan ka chand.......evaan-e-jannat main jaa utra
Aur phir merey ghar ka angansoona soona ho gaya......fizaayin ansoon se dhundla gayin
Ik shore utha......Mubarak badiyon Ka.....
Mubarak ho jaan maadar ki shahadat azeem..................................
Mubarak ho jaan bradar ki shahadat azeem.......aur main khuli hui sakit aankhon se sub kuch dekhti hoon
Meri ankhon main hamesha uska hansta muskuraata chehra
Wo jo......shokh is qadar.............k
Uskey saamney behtey ansoo thum jaatey thay
Aur waqt-e-rukhsat bhi apni muskuraati aankhon main hazaaron iltijaayin samet kar us ne maa k hathon ko thaam kar kaha tha

Maa.......mujhey rokna nahi.......k...........
Be gunah Sawat ke Logo ki khuli hui bey noor aankhain.........
Sawat Ke.....................
Maaon k rondey huye dopattey..............
Behno ki tooti hui chooriyaan................in ki aahain aur siskiyaan mujhey soney nahi detin
Unki ghuti ghuti cheekhain pukaarti hain......
Har dum savaal karti hain
"kia aaj koi bhi fateh khebar nahi..............
K jiski hebat se kufur larza bar andaam ho
Kia aaj koi bhi saifullah(khalid bin walid)nahi...........
K jiskey ro baroo kufr ki har talwaar toot jaaye
Kia aj koi bhi tariq ibn-e- ziad nahi.....
K jiska yaqeeney kamil bey yaqeeni ki har naao ko jala dey
Kia aj koi bhi mehmood but shikan nahi.........
K jo sanum khana kufr ko taraj karey
Kia aaj koi bhi muhammad bin qasim nahi........
K jo bin t-e havva ki pukar par labbek kahey"
Tub maa ne uski chand jesi peshaani choom kar...................................................
Kaamyabiyon ki dua di thi manzil ko paa leney ki dua di thi
Aur phir......................maa ki dua ne baargaahey eezdi main qubuliyat ki sund paa li thi
K wo maa ka chand sarzameen-e- Sawat pe apney garam jawan lahoo se.....................

Shujaat ki nayi tareekh raqam kartey huye
Shahadat ka amrat jaanfza pii kar.....................
Amr ho gaya jawidaan ho gaya
Aur ab maa k dil ko ik hasrat hai
Tu sirf itni.............................k kaash.....................
Ey kaash............................................................
Ik aakhri baar
Apney chand ki peshaani choom leti...............
Sar zameen-e- Swat main mehvey khaab honey se pehley
Buss aik aakhri baar
apney chand ko jii bhar k dekh leti............
evan-e-jannat main utarney se pehley.......!!!!

                                                             (Dedicated Only...To Bilal ......)

 

AalizYaan

On Mothers Day 09-May-2010

(I Wrote Poem for Bilal ,So Kindly Before Copying Do lem me Know)

Regards

Aaliz